CODEX DIMONIE
CODEX DIMONIE easti unu manuscrisu aflatu di Gustav Weigand
tsi-lj deadi aestâ numâ dupu numa a fumealjei di Ohrid (Makidunie) la cari fu
aflatu. Shi-aestu manuscrisu easti fârâ datâ/anu shi fârâ numa atsilui tsi
lu-nyrâpsi. S-pari câ suntu ma multsâ autori câ s-ducheashti aestu lucru dupu
turlia cumu suntu anyrâpsiti textili.
Matilda Caragiu-Mariotseanu dzâtsi: " dupu turlia a limbâljei, s-pari câ textulu
fu apridusu pi-armâneashti tu-ahurhita a etâljei XIX.
Prota parti di manuscrisu fu transcrisâ shi-apridusâ pi ghermanâ di unu elevu
di-alu Weigand, Paul Dachselt, tu volumlu I ditu "Anuarlu" alu Gustav Weigand
(Jahresbericht, Leipzig, 1894).
Matilda Caragiu tsi s-aplică multu pisti aestu manuscrisu dzâtsi: "Codex Dimonie
easti unâ adunari di texti bâsiritseshtsâ tsi autorilji-apriducâtori
lj-acljimarâ "didahii".
Suntu 15 di texti. Trâ ma multi informatsii mutrits articollu ali Matilda
Caragiu-Mariotseanu - "Biblia la Aromâni", Revista de istorie si teorie
literară, Bucuresti, 1991, p-306-315.
Aflarea a manuscrislui "Codex Dimonie" easti di mari simasii trâ isturia
spiritualâ a Armânjiloru. Elu easti unâ dealihea mârtirii câ Armânjilji câftarâ
sâ-shi lunjineadzâ suflitlu tu limba loru di dadâ. Manuscrislu easti anyrâpsitu
tu unâ spâstritâ/chischinâ limbâ armâneascâ, di unâ mushuteatsâ ahoryea tsi nu
va u mata aibâ manuscrisili di dupâ tsi ahurhi contactulu cu Rumânia shi cu
sculiili tu limba rumânâ trâ Armânji.
Kira Mantsu II-LU CURSU DI LIMBÂ SHI LITERATURÂ ARMÂNEASCÂ